LeTegnùe, 'na oasi al largo de Ciósa
Robe de Ciòsa - de Angelo Padoan
Un sònio tropicale in mezo al mare. A tre milia al largo de Ciósa se amira un parco naturale dove i fondai, semenà de "infioressense" rociose che le pare scogère coraline del Mar Rosso, le rapresenta un senario unico per tuto l'Adriatico. No a ze un miragio, fruto del sole caldo de rista... Le ze le "tegnùe". Quatro aree diverse per orìgine e conformassion, dove che se pòle trovare esempi rarissimi de flora e de fauna. 'Na oasi nata misteriosamente quatromila ani fa, quando el mare, mondo pi basso de ancùo, gera sircondà da rive e trati de spiagia. La siensa no a ancora svela in maniera precisa l'orìgine de ste strane "infioressense". Qualchedun parla de foraussita de gas metano dal sotosuolo, che a contribuìo a la precipitassion de i carbonati provocando la cementificassion de le particele de sabia e detriti. Strati rociosi s'à stratifica creando un "habitat" spessiale dove pian pianin a scomissià la so vita organismi vegetali e animali che, a so volta, co la deposission de scheletri e gussi, a contribuìo a formare incrostassion calcaree. Ancùo le "tegnùe" ze 'na risorsa biologica pressiosa e delicata, abita da serte spèssie itiche rare che ofre un spetàcolo naturale unico e afassinante. El mistero de 'na oasi naturale che ze sarà nel so nome. No a ze un nome fantastico o inventa. Le "tegnùe" ne la so etimologia svela tuta la so storia segreta. In dialeto ciosòto, infati, "tegnùe" vuoi dire "trategnùe" e le indica la carateristica de le "infioressense" rociose de sta area indove se intrapolava (o, mègio, se incatigiava) i ré a stràssico de i pescaori. Ste strane formassion marine gera conossùe za nel 700, ma la siensa 
s'à interessa al fenomeno solo ne la seconda metà de i ani Sessanta, do studi geologici a la zona sensa però riussire a spiegarne del tuto l'orìgine. L'atension pùblica a le "tegnùe" ze scomissià da poco, co le imersion e i video del sub padovan, Piero Mescalchin, che a fato cognòssare la belessa e la particolarità in tuto el mondo. Ne l'iste del 2001 l'«lstituto per la ricerca applicata al mare» (Icram) a fato 'na serie de rilevamenti altimetrici ne l'area più grande de le quatro, realisando 'na mapatura de i fondai. Se trata de "sostrati" duri, rarissimi ne i fondai sabiosi e fangosi de l'Adriatico. El 5 de agosto del 2002 el Ministero de le Politiche Agricole e Forestali a aprovà el decreto che riconosse le "tegnùe" zona a tutela biologica. El 4 de dissembre del 2002 ze nata l'Associassion "Tegnùe de Chioggia" onlus, presiedùa dal stesso Mescalchin e direta da un comitato tecnico e sientifico forma da 'na venténa de esperti che provien da le Università de Padova, Venessia e Bologna, dal mondo de la ricerca e de la pesca.
Po' dopo se ga pensa al problema de la gestion. La selta, adotà ne l'iste del 2003, a premia 'na gestion comune de tute le categorìe a diverso modo interessàe a la tutela e a la valorisassion de l'area. Sarà cossi possibile da 'na parte preservare l'integrità de l'area, da l'altra continuare la conossensa atraverso el monitoragio de la fauna itica e de i popolamenti, arivando a 'na mapatura precisa e aprofondìa de i elementi rociosi e de tuto el biosistema, adesso solo in parte rileva. Sarà anche possibile fare un elenco de le spèssie itiche completo e de cognòssare el ciclo vitale de ogniuna, in modo da permétare interventi giusti su l'ecosistema e conservare el so equilibrio. Dal 2004 la risorsa biologica ze compresa ne l'oferta turistica "de qualità", che unisse l'aspeto balneare de Sotomarina co la valorisassion del patrimonio stòrico-naturalistico de l'area. Su l'esempio de esperiense idèntiche za aprofondìe in altre riserve marine, come quela siciliana de Aci Castelo, le "tegnùe" podarà vérzarse a serte atività inovative: workshop, pescaturismo, borse de studio, escursion guida, archeologia subacquea, seminari de divulgassion e inissiative didatiche.
Creature somerse. Tra le "infioressense" rociose che ricorda le bariere coraline del Mar Rosso, vive spèssie de péssi uniche ne l'Adriatico e 'na flora sorprendente. Ècole:
1. Bavosa bianca: la ze carateristica per la fassa nera. Longa fin a 7 cm, la se pòle trovare fin a 25 metri de profondità.
2. Grongo: longo fin a 2 metri, a deventa ativo verso sera. Nonostante la cativa fama, a ze spesso dòssile e per gnente agressivo, se tratà co el dovuto rispeto.
3. Paguro bernardo: l'aprofita de i gussi vòdi de moluschi gasteròpodi, per difèndare le parte pi delicate del proprio corpo.
4. Merluzzetto: a ze presente in banchi pitosto abondanti. A ze longo fin a 30 cm, l'à el dorso color carne e el ventre color arzento.
5. Astice: l'à de le forti tenàgie (chèle) che l'adòpara per atacare le prede. Raro ne i fondai de l'Alto Adriatico, ze fàssile trovarlo ne la riserva marina de le "tegnùe".
6. Granchio (gènare "Inachus"): a vive spesso in simbiosi co le spugne, che, fissàndose a le so sate, lo mimetize sfrutando cossi la mobilità.
Per informassion rivòlgerse a Associazione "Tegnùe di Chioggia" - onlus, Palazzo Morari - 30015 Chioggia (VE) -e-mail: tegnue@tegnue.it - sito internet: www.tegnue.it. E me scuso co i letori se stavolta su sta costreto a usare un lenguagio massa sientifico. Ma no se podèva far de manco, data la qualità de l'argomento.
Imàgini del patrimonio stòrico-naturalistico de l'area de le Tegnùe de Ciósa.
(foto gentilmente concesse da l'autore, Piero Mescalchin)
Lujo-Agosto - 2007